خواطر واحد خرج من الشرنقة و عايز ينام برضه

بعد ماخلصت امتحانات يوم الثلاثاء 10 / 6
ابويا جه و قال هنروح راس البر الاسبوع الجاى و طبعا زى ماحنا عارفين الاسبوع ده مش هيبقى فيه هناك غير الناس الحلوة بتاعه شبرا و امبابة و الفلاحيين اصحاب الصورة التقليدية للنسوان اللى لابسة عباب\يات سودا و معاهم حلل فيها محشى على البلاج او عيل صغيرة نازلين البحر بالبسة بفتة او شباب سمر لابسين كات و نظارات شمس و شاليين كاسيت على كتفهم و على اساس ان انه تقريبا خارج الموسم و مفيش حد بيبقى فى البلد و الاسعار رخيصة
لكن طبعا بدام ابويا قال كده خلاص لازم نقول الامر امرك ياسيدنا و يالا بينا نشد الرحال على هناك
ناهيك طبعا ان البلد كانت فاضية و ناهيك عن بعض التفاصيل الخاصة اللى متهمش حد الا انا
المهم بتاعنا بقه ايه
اول مرة فى حياتى او على الاقل على ماأفتكر يعنى اقضى اغلب وقتى بره البيت ,لاول مرة اقضى وقتى بره
انا المعتاد بتاعى انى اقعد فى اوضتى ممكن اسبوع اقله من غير ماأخرج
لغاية مابويا بقه بيقولى صبح و ليل يبنى انا خايف عليك تبقى مجنون
لكن فى راس البر انا كنت بقضى على الاقل ست ساعات بره البيت
لوحدى صحيح
بس وسط الناس
زى ماتقول ان العبد لله خرج بره الشرنقة
و شاف العالم
و الاسبوع ده غير كتير من مفاهيمى قوى و ممكن لو استغليته صح اقلب حياتى تماما

اهم اكتشافاتى:
اولا انى زى مابويا و اصحابى بيقولوا ,انى مجنون
انا اغلب تفكيرى جاى من الكتب او النت اللى همه حياتى
يعنى كله نظرى
و اكتشفت انى مليش اى علاقة بعالم الواقع و انى عايش فى الخيال و انى معنديش اى خبرة فى التعامل مع عالم الحقيقة
يعنى مثلا لو واحد رزل عليك هتعمله ايه؟؟؟
انا اتعرضت للموقف ده اكتر من مرة وكان رد فعلى كل مرة زى الخرة, حاجة بيض بيض
لو واحدة جات تتمشى قدامك مرة و التانية و التالتة هتمعل ايه؟؟؟
طيب و لو جت قالت لك الساعة كام و هى لابسة ساعة؟؟؟
طيب و لو خبطت بالعجلة فيك؟؟
هتمعل ايه
برضه اتعرضت لمواقف دى و كان رد فعلى زى الخرة و اكتر شوية
انا مش بقول انها تقولى الساعة كام اقوم واخدها بوستين
لكن انها تقولى الساعة كام اقوم متنح و فاتح بقى و بعدين اقولها الساعة 11 و نص و بعد ساعة افهم هى كانت عايزة ايه
ده خرة
على الاقل ابقى فاهم
يعنى انا مش بعرف اتصرف خالص
ثانيا
يبدو انى حليوة قوى بس مكنتش عارف
انا لاول مرة فى حياتى اخرج بالصورة دى و لاول مرة ى حياتى اخد بالى من نفسى
يعنى اسرح شعرى و اكوى هدومى
بدل نظرية الشيوعى المثقف اللى كنت عايش فيها
انا مكنتش نازل اعاكس و انا عمرى ماعاكست و انشاءالله عمرى ماهعاكس بس انا كنت بنزل اتمشى او اقعد على البلاج او شارع النيل
و صراحة كنت ببص بس
بادبى يعنى
بس اتعرضت لمواقف كتير شوية لو كان حد مخلص و مضبط كان علق فيها دستة بنات على الاقل
لكن انا بتاع الساعة 11 و نص
اهم حاجة فى الموضوع ده , هى الثقة, انا خدت ثقة كبيرة جدا و اتغيرت نظرتى لنفسى و لحياتى

ثالثا و ده للاسف
اغلب الكلام اللى ابويا بيقولى عليه و قالى عليه طلع صح
و طلع الراجل عنده حق فى كل اللى قاله
تقريبا
و طلعت انا غلط فى اغلب اللى بقول عليه
و منها مثلا انى مجنون هوه عنده حق و انا غلطان
رابعا و اخيرا علشان عايز انام
انا كل حياتى بيحركها دافع واحد و هوه الكسل
انا كنت فاكر انى باخد مواقف
لكن كتير من مواقفى اللى المفروض تبقى نابعة من مبادئ هى نابعة من كسل او خوف
زى موقف كليه الطب
مش ممكن اكون انا كسلت اذاكر
مش انى بنثيت موقفى على اساس مبدا انى مش بحب كلية الطب و مش هقضى حياتى فى شى مش بحبه


خامسا معلش يعنى
انا اغلب "التفكير " بتاعى عبارةعن انى اقعد لوحدى افكر و ياما اوصل لنتيجة انى عايز الحرق و انى غلطان فى كل حاجة و شوية بكاء على الاطلال ياما اوصل للنتيجة التانية انى الجميع بهايم و عايزين الحرق
و فى الحالتين نادرا مابيبقى فى موقف ايجابى

انا اتمنى انى استفيد من الاسبوع ده بصورة كويسة