النصر القريب خواطر واحد عايز ينام

من كام يوم كنت مبضون كالعادة و ان كان انا بقالى فترة مبضون شويتين زيادة عن المعتاد
المهم مش عايز اخرج عن الموضوع
اتصلت باصحابى علشان انزل معاهم اتمشى شوية و دى الميزة الوحيدة اللى انا شايفها ليهم
برضه المهم
رحنا قعدنا على النيل الساعة 12 و لا واحدة بالليل
و كان باين يوم الخميس و لا الاربعاء
المرة دى ماعلينا
للمرة المليون شفت على البحر فى اهم شارع فى المنصورة و فى منطقة حية حية حية جماعات من الشباب الحلو بيضربوا بانجو
كده علنى علنى على النيل و يكاد يكون بصورة يومية و من الساعة 9 لغاية بالليل بقه يعنى مش مرة و لا اتنين و لا كام واحد
لااااااااااااااااااااااااااا
كذا جماعة بتبقى قاعدة فى نفس الحته فى وسط البلد لو حبيتوا تقولوا كل يوم و كذا ساعة
الجديد المرة دى انى شفت او بمعنى اصح واحد صاحبى حكى لى _ اصلى نظرى ضعيف شوية ...ضريبة الذكاء بقه
بقول شفت مجموعة تانية من الشباب الحلو قاعدين على النيل برضه
بس دول كانوا بيشربوا حشيش المرة دى مش بانجو
و فى كبابة كمان
الجديد برضه انك تلاقى حمامات موقف البيجو فى المنصورة مليانة سرنجات
و انك تلاقى قزايز خمرة مرمية على الكورنيش
و انك تلاقى قزايز البتاع ده دوا الكحة مرمية فى استاد المنصورة
و انك ممكن تلاقى واحد موقفك على كوبرى الدائرى الجديد زى ماواحد صاحبى قالى علشان يعرض عليك انك تشترى اى نوع من المزاج يعنى واحد واقف يبيع مخدرات للناس على مدخل البلد
و انك تعرف ان الشباب الوطنىطلبة كليات الجيش و الشرطة بيشربوا حشيش على الطريق و همه بيسافروا اسبوعيا رايح جاى للكلية بتاعتهم
و احيانا السواق بتاع الميكروباص ياخد اجرته حشيش
احنا بقينا شعب الحشاشة على مايبدو
مش عايز ابالغ فى الموضوع
بس نلاحظ مع بعض انى اولا مليش خبرة بالمواضيع دى
وانى مش شوارعى بمعنى انى مش بقضى اغلب يومى فى الشارع يعنى

و ده معناه ان ربما الامر يكون زاد من مرحلة السكرتة و الخباثة للعلنية
ربما معدش حد هامه
ربما الاعداد زادت و بالتالى المتهورين زادوا
ربما قوات الامن معدش ليها علاقة بالموضوع و اخرهم يعتقلوا الاخوان المسلمين و خلاص
مش عارف بس الموضوع بقه علنى كده و كله فى اللذيذ
حته الدعارة بقت علنى
انا مش عارف ايام زمان كان ايه الوضع لانى مكنتش موجود
لكن الدعارة علنى
يعنى لو ربنا كرمك و قررت انك تنزل ليلة الخميس
و لو ربنا كرمك اكتر و حبيت تركب و لقيت فعلا ميكروباص فيه مكان لبشرى

احتمال كبير جدا تلاقى قاعدة لموخذة جنب السواق مستنيين لما يخلص الدور ده و يروحوا
ناهييك عن برضه عن الناس اللى ممكن توقفك فى الشارع و تقولك اى خدمة يابيه تحت امرك
ايه مزاجك فى الحريم



واضح ان فيه خازوق ما واضح ان فى غلط ما
ان كان الواحد مستنى النصر او العزة او التقدم او اى حاجة عدلة
فواضح ان اللى جاى مش هيبقى ظريف ابدا
واضح ان الحالة اللى مصر فيها هى من كرم ربنا مش من غضبه
يعنى منحة الهية احسن من اللى المفروض يحصل
و لا انا ببالغ
يمكن