النهاردة فرحى ياجدعان

الأولة احتفال و التانية احتفال و التالتة تيفال

مش ممكن اول تعليقين عندى يبقوا من مين؟

ابن بهية و ابن ناصر مش اى اى و لا اى زى

يعنى من كانت مدونته بادية كده شوف النهاية هتبقى عاملة ازاى؟؟؟؟



صحيح ابن بهية تقريبا ملقاش حاجة يعلق عليها فى المدونة و اكتفى بانه شكرنى على السؤال عنه فى فترة غيابره اللى فاتت

بس برضه يظل ده شرف كبير ليا

اما بالنسبة لابن ناصر بالحق نقول بقلم سمير رجب ان الراجل قرا اللى انا كاتبه

عارف عارف ان محدش مصدق و لا انا مصدق

لكن هنعمل ايه

هوه شايف انى متحامل على مارتن لوثر كنج و جيفارا

لكن انا مش متحامل

انا هنا بطبق مبدأ ان الجهل سيد الاخلاق يعنى ايه ؟

الحكم على الناس بالشبهات

جيفارا شيوعى يعنى ايه؟؟؟؟؟ ملحد

مش يؤمن بوجود اله اساسا

احبه ازاى؟

اما مارتن لوثر كنج

فانا اعرف ان قال عن اسرائيل انها اهم انجاز للديموقراطية فى القرن العشرين

و ده كافى انى اكره الراجل و اللى جابوه

خاصة ان المبادئ مش تتجزئ

يعنى مينفعش ابقى عندى مبادئ عدل و مساواة فى حته و اشجع الارهاب و البلطجة و التفرقة فى حته تانية

زى ماروسيا بتعمل و قارفانا ان اللى بتعمله امريكا فى العراق يتنافى مع مش عارف الاعراف و المواثيق الدولية

فى حين انها نافخة الشعب الشيشانى و انا قريت انهم قتلوا منه حوالى ربع مليون مع اعتبار ان الشيشان كلها مليون و نص باين

يعنى اوسخ من امريكا

المهم انا قلت فى الاول ان الجهل سيد الاخلاق

لانى اولا معرفش تقريبا اى حاجة عن جيفارا غير المبادئ رحلته على الموتوسيكل فى امريكا الجنوبية و انه دكتور و ان كان عنده ربو باين و انه حب يبقى فى الاحراش يحارب احسن مايمسك سلطة

لكن ايه؟؟؟؟؟؟؟؟

ايوة شيوعى

و مارتن لوثر كنج انا مش متاكد انه قال كده على اسرائيل

لكن ايه؟؟؟؟؟؟؟

انا مش فاضى اتاكد و عندى حاجات اهم من انى اعرف هوه قال كده و لا لأ

المهم انى وجدت شخص نظيف احبه

و هوه مالكوم اكس

و ده كفاية عليا على الاقل كام سنة قدام





ملحوظة: لابن ناصر (ده لو دخل تانى)

انا معنديش كتب عن مالكوم اكس

لانى بطلت قرايه اساسا من حوالى سنة لان جالى اكتئاب لما حسيت انى بدات افهم

الحياة

و كل اللى اعرفه عن الراجل ده من سماع خطبه من على موقع اليوتيوب

بس

powered by performancing firefox